Кевин Дурент и Коби Брајант им донесуваат победи на своите тимови со трипл-дабл учиноци

Во серија од интересни натпревари на програмата синоќа, Коби Брајант и Кевин Дурент со трипл-дабл учиноци им донесоа победи на своите тимови против Хјустон Рокетс, односно Голден Стејт Вориорс.

ЛА Лејкерс 119 - 108 Хјустон Рокетс

На последниот натпревар синоќа, ЛА Лејкерс за прв пат во новата сезона стигнуваат до изедначен рекорд од 5-5, откако со победата над Рокетс им го нанесоа шестиот пораз оваа сезона. Новиот тренер Мајк ДиАнтони повторно не успеа да дебитира на клупата на Лејкерс и се одлучи своето тренерско деби да го одложи за уште некој ден.

Коби Брајант беше спектакуларен синоќа, откако со 22 поени, 11 скока и 11 асистенции го оствари својот 18. кариерен трипл-дабл учинок.

“Јас сум поентер, не остварувач на трипл-дабл учиноци.“ - изјави Коби Брајант по натпреварот во кој оствари трипл-дабл.

Кај ЛА Лејкерс исто така супериорен беше и Двајт Хауард, кој заврши со 28 поени, 13 скока и 3 блока. Пау Гасол на крајот имаше 17, додека Мета Ворлд Пис 15 поени.

Кај Хјустон Рокетс најсолиден беше Џејмс Харден со 20 поени и 7 асистенции, додека Чендлер Парсонс погоди 4 тројки за на крајот да оствари 24 поени. Џереми Лин повторно потфрли со 5 поени и 10 асистенции, додека одличен од клупата беше дебитантот Теренс Џоунс.

Оклахома Сити Тандер 119 - 109 Голден Стејт Вориорс

И во уште една убедлива победа на домаќинот, уште еден трипл-дабл за нивниот најдобар играч. Оклахома Сити Тандер стигнува до осмата победа оваа сезона, а тимскиот напор повторно клуч за победата на Тандер.

Како што напоменавме, Кевин Дурент го оствари својот прв трипл-дабл во својата млада кариера, постигнувајќи 25 поени, 13 скока и 10 асистенции, а на оваа статистика можете да додадете уште 2 украдени топки. Расел Вестбрук беше човекот позади него, со најдобри 30 поени, 7 асистенции и дури 5 украдени топки од противникот. Кевин Мартин продолжува да импресионира со улогата на шести човек, откако и овојпат од клупата постигна 23 поени и 5 асистенции.

“Некои играчи можат само да постигнуваат поени, некои само да асистираат, а некои само да скокаат по топки. Кевин Дурент може да направи буквално се. Затоа тој е играч од MVP калибар, а вакви партии пружаат само играчи од тој калибар.“ - изјави тренерот Скот Брукс, зборувајќи за големата ноќ на Кевин Дурент.

Кај Вориорс најефикасен беше Стефан Кари со 22 поени и 6 асистенции, додека Дејвид Ли заврши со 19 поени и 8 скока. Потфрли Клеј Томпсон, кој имаше катастрофална ноќ со само 4 поени и реализација 2-8 од поле.