Мартел Вебстер се избори за договор со Визардс

Крилниот кошаркар Мартел Вебстер се договори за сите услови околу соработката со Вашингтон Визардс и се очекува да потпише договор во наредниве денови.

Вебстер минатата недела престојуваше во Вашингтон, каде беше на проба кај Визардс и може да се каже дека задоволството кај стручниот штаб беше повеќе од очигледно, со тоа што тие му понудија договор кој тој веднаш го прифати. Засега не се познати условите кои му се понудени во договорот, кој во наредните денови треба да биде и официјално потврден, а се очекува Вебстер да потпише едногодишен договор.

Овој 25-годишен играч има 7 години искуство во најсилната кошаркарска лига во светот, каде што ги застапуваше боите на Портланд Треил Блејзерс и последниве две години за Минесота Тимберволвс. Во дресот на Минесота не успеа да се избори за стартната петорка, а бележеше просек од 8.4 поени и 3.4 скокови во просечни поминати 24 минути по натпревар. По истекот на сезоната од тимот му беше врачен отказ и сега тој најде нов тим.

Визардс во текот на оваа предсезона ги доведоа Тревор Ариза и Емека Окафор, а го ослободија Рашард Луис. Освен овие двајца тие го прибраа и Еј Џеј Прајс и на драфтот го одбраа Бредли Бил -- играч од кој очекуваат високи достигнувања.

Tweet