Клиперси славеја во Солт Лејк Сити, Порлтанд со пресврт стигнува до победа

Клиперси им нанесоја нов пораз на Џејзерите во Солт Лејк Сити, со сјајната партија на Грифин - 30 поени и 11 скока. Исто така ноќта ја обележа и Портланд кој со спектакуларен пресврт од -18 против Шарлот Стигна до победа.

Л.А Клиперси полека, но сигурно влегуваат во форма. Стигнаа до третата победа по ред оваа сезона против Џез со 105-104, а најдобри беа во последната четвртина со 32-31. Во финишот пресуди мирната рака на Џамал Крофорд, кој беше сигурен од слободните фрлања. Партија на сезоната одигра Грифин кој имаше 30 поени и 11 скока, Крис Пол додаде само 14 поени и 9 асистенции, а Џамал Крофорд од клупата додаде 20 поени.

Во домашниот состав Мо Вилијамс имаше 20 поени и 12 асистенции, Ренди Фој даде 19, Ал Џеферсон имаше 16 поени и 10 скока.

Највозбудлив меч е одигран во Шарлот, каде Блејзерси се вратија од -18, и на крајот славеја по продолжението со 118-112. Се чинеше дека е се решено кога Бобкетси на нешто помалку од 5 минути до крајот имаа водство од 97-79. Блејзерси сепак направија страшна серија од 23-5, иницијирана од Демиан Лилард, ЛаМаркус Олдриџ и Лук Бабит, кој погоди тројка за 102-102, на 22 секунди до крајот.

Бобкетси преку Кемба Вокер пробаа да стигнат до победа, но тој со звукот на сирената не беше прецизен, па се играше продолжение. Шокираните домаќини немаа шанса во додатните пет минути, Бабит и Батум погодија нови тројки, па победата заслужно оди во Орегон.

ЛаМаркус Олдриџ имаше 25 поени и 13 скока, 24 поени додаде Лилард. На другата страна Бен Гордон имаше 29 (8/12 за тројка), додека Вокер додаде 22 поени и 7 асистенции.

Орландо после победата во Л.А, дојде до ова победа на страна, овој пат против Голден Стејт во Оукленд - 102-94. Гостите од Флорида беа изедначине три четвртини, беа одлични и во последниот период и така ја продолжија низата на победи на Западот. Глен Дејвис беше секаде, имаше 24 поени, 6 скока, 4 асистенции и 2 блока, додека Арон Афлало придодаде 24 поени, а црногорскиот кошаркар Никола Вичевиќ имаше 14 поени и 15 скока. Стеф Кари со 25 поени и 11 асистеции беше најдобар кај “Воините“, додека Дејвид Ли придодаде 22.

Денвер во Колорадо го запиша петтиот триумф во шест одиграни натпревари. Нагетси пред своите навивачи во “Пепси Центарот“ го совладаа борбениот Торонто со 113-110. Репторси губија 5 минути пред крајот со 103-86, но со храбрата игра на гостите за малку не стигнаа до пресврт. Сепак тројка за продолжение промаши ДеМар ДеРозан. Нагетси беа предводени од Кори Бруер кој имаше 19 поени, 18 даде Кенет Фарид со 10 скока, а кај гостите од Канада, Кајл Лаури имаше 24 поени и 7 асистенции, 23 поени даде Андреа Барњани.

Детроит го надигра Кливленд со 89-79. Кај Пистонси најдобар беше Брендон Најт со 17 поени, и по 5 асистенции и скокови, а по 15 поени имаа Тајшан Принц и КајлСинглер, додека Грег Монро имаше 9 поени, 14 скока, 5 асистенции, 2 украдени топки и 2 блока. Кај Кливленд доминацијата ја продолжи Андерсон Варежо со 17 поени и 18 скока, за 9ти дабл-дабл по ред.

Денешни Резултати :

Шарлот Бобкетс 112-118 Портланд Траил Блејзерс

Детроит Пистос 89-79 Кливленд Кавалирс

Њу Орлеанс Хорнетс 102-81 Милвоки Бакс

Денвер Нагетс 113-110 Торонто Репторс

Јута Џез 104-105 Л.А Клиперс

Голден Стејт Вориорс 94-102 Орландо Меџик