Џон Вол: “Мислам дека Роуз не би требало да заигра оваа сезона“

Плејмејкерот на Вашингтон Визардс, Џон Вол, кој добар дел од оваа сезона пропушти поради повреда, смета дека бившиот МВП на лигата и играч на Чикаго Булс, Дерик Роуз не би требало да се враќа на паркетот оваа сезона.

Имено, организаторот на играта на Визардс е уверен дека, по тоа што Ди Роуз не заигра оваа сезона, тогаш апсолутно е бесмислено сега да се враќа на паркетот. Тој смета дека најдобро за Чикаго е да одмори до почетокот на следната сезона во која ќе може да влезе комплетно опоравен од повредата.

“Мислам дека Чикаго и соиграчите на Роуз разбираат во каква состојба се наоѓа тој и она што до сега тој успеа да го направи за својот тим и градот. Сите се свесни колку напорно работеше и колку сака да се врати во игра за тимот од градот во кој е роден. Покрај тоа, сите ќе разберат доколку не се врати оваа година. Не е реално сега да излезе на ризик, а сигурно е скрос надвор од ритамот“ - смета Вол.

Ди Роуз се повреди на 12 мај минатата година во натпреварот со Филаделфија во првото коло од плејофот.

“Чикаго и на овој и на оној начин ќе влезе во плејофот, а Роуз нема да игра сигурно над 20 минути. Тие и сега, без него се добар тим, играат одлично во дефанзивата. Верувам дека Роуз би им донел добро расположение, но не и 20 минути на теренот. Потребно му е повеќе време.“ - порача Џон Вол.

Тој додава:

“Јас на почетокот од март се опоравив комплетно. Дури сега сум во добар ритам. Толку ми беше потебно за опоравување. Првите месец и пол дена играв по 20 минути. Кога играш по 5 минути во секоја четвртина не можеш да ја пронајдеш својата игра. Тоа е многу тешко. Но, кога ќе почнеш да играш во првата петтока и кога ќе добиваш повеќе минути, тогаш се е полесно“ - појасни Џон Вол.