Пол Пирс: “Планирам да играм уште 10 години“

Многу неверуваа дека Бостон, кога почнаа приказните околу трејдот на нивниот долгогодишен капитен, дека ќе се одлучи на тој потез. Се мислеше дека искусниот 35 - годишен Пол Пирс ќе стане еден од оние ретки играчи кои низ кариерите играле само за еден тим..

Меѓутоа, на големо разочарување на бројни љубители на најтрофејниот НБА тим, тоа не се случи. Како што е познато, Дени Ејнџ го започна процесот на одново градење на тимот, а искусното трио Пирс, Гарнет и Тери беа испратени во Нетси.

Меѓутоа фактот дека неговиот сакан клуб се одрече од него и дека наредната сезона ќе ја почне сосема во нова средина, нема да го угасне страстот за кошарка во Пол Пирс. Напротив, искусниот кошаркар вели дека има сеуште гориво во резервоарот и дека планира да игра уште 10 сезони.

“Кој рече дека мојата кариера е готово? Јас планирам да играм уште 10 години“ - во свој стил порача легендарниот Пол Пирс.

Колку се вистинити зборовите на Пирс е веќе друго прашање. Меѓутоа, она што е сосема извесно, е дека овој човек е желен за успех. Од челниците на својот бивш клуб бараше само едно: да биде трејдуван во тим кој има шампионски амбиции.

Доведувањето на искусното трио од Бостон со староседелците Џо Џонсон, Брук Лопез и Дерон Вилијамс ги направи Нетси кандидати за титулата.

Дали Пирс користеше метафори во своите зборово, не е познато, но она што е познато е дека најдобриот стрелец во историјата на НБА лигата Карим Абдул-Џабар играше до својата 42 година. До 42 играше и Дикембе Моутомбо, додека пак Кевин Вилс остана во НБА до својот 44 роденден.

Колку ќе остане Пирс, ќе покаже времето. Она што се знае е дека минатата сезона просечно постигнуваше по 18.6 поени, фаќаше по 6.3 скока и делеше по 4.8 асистенции. Повеќе од тоа управата од Бруклин не може да очекува...